وردت اطيور المحبه....الهورهه وغنت سلام اعيون الأحديثات طرزهه كحلهه..... وصارت الحنه وسام والجوامع كبرن ود ومحبه.... والكنائس رددن أحله الأنغام وركصوا اطفال المحله.....شوك أهلهم ....والأيام طشت الدنيه محنه وافتره خلك الوطن..... وشرع البيبان جنه وغنت ابفرحه الفخاتي..وشفت أهلنه املبس وجكليت والحب ازدحام لا جيش القدس لا جيش شعبي.... لا مسيرات ورفاق اصبحن ذني حرام ولاذ ابو الزيتوني ذله.......لاذ بأكتار المذله كمره ........وانزاح الظلام افرح....افرح .......يا وطن وانكل الخطوات واثق للأمام ذني وعيونك زوابع .... يكضن وترجع تنام وتحلم انجومك مدينه....... بيبانهه ود وئام وفرحه..قرحه.......اتشيل فرحه ...............والأوهام ماتن ابطيحة هبل......والأمل خضر أمل انهض ...انهض ....يا وطن (حيي على خير العمل) صافح اعيون النهار لوحه حط البندقيه......اتطرز امتون الجدار واظفر حيوط الشمس...للحب شعار افرش ارضك مزهريه....وماي نهرانك أغاني وضحكهبشفاف الزغار سوي من ثوب العرايس لافتات اتوضت ابماي الأنهار نعم للحب.......للتسامح....للحدايق....للأزهار لا.......كل.....اللا ....لأصوات البنادق للتناحر......للتتار
1
ومضات
الفجر ما ينعد فجر
لوما السحر
والليل ابد مو ليل
اذا ما بيه سمر
2-
اشلون اوصفك ........
انته يالطبعك سمح
الشعر بايك سواد الليل
والوجنه الصبح
3-
كالولي عنك نهر
وبروح عطشانه اعتنيك
من وصلتك .....
بس سراب
ابوسط صحرائي لكيتك
4-
ابشوك اشتهيتك قلم .....
تكتبلي ما اعنيه
ترسم امل بالكلب
ابون الوفه تمليه
صدك ........لكيتك قلم
لكن حبر مابيه
5-
ابكلبي رسمتك فرح
لوحه .......
الوفه عنوان
جيتك لكيتك حزن ......
واختلطت الالوان
6-
فرض اليصلي انعرف
17ركعه
بس انه بمودتك
ياخلكي اشوسعه
كل يوم اصلي الك
9 انه× 9
يالغريب الغربه سل...........وفركة الخلان تكتل
واليعيش ابغير اهله...............ايموت ذل
ليش عالمامش تعيش...........وانته كل
وليش وحدك عالرصيف..اتسامر اهمومك حزين
وليش تترجه امل تعبان.......والحسره ونين
شايل اهمومك هويه..امطرزه ابضيم السنين
تغفه وي الضيم خل...يالغريب الغربه سل
يالغريب
هاي ديرانك بعدهي..ابشوكهه تسأل عليك
وهاي وردات البنفسج ....شتل اديك
اتناطرك تسكيهه فرحه..وتكبر ابفرحتهه بيك
تصعد ابصوتك اغاني...اتطير شوك وتعتنيك
تدري هي اوياك حل...يالغريب الغربه سللللل
وفركة الخلان تكتللللللل ...
.....
أنتِ كمره......
اشما يصير الليل
يحتاج الضواج
وأنتِ نسمه
ويا هوه اعذيبي عشرتج
والهوه مالوم اذا ما بيه هواج
سجن حبج
وكلبي مرتاح اعله سجنه
اتحزم ابشوكه واجاج
الدنيه ليهوب وسموم
وانت طاسة ماي بارد
وكلبي صايم واشتهاج
سجن حبج لوحه من لون البنفسج
خضر القداح من نكلة خطاج
سودنتني
نكلة أجدامج مصيبه
يا مشي البطران متعمد شجاج
حبج أدريبه جهنم .......وآنه راضي
ووين ما تمشين....ياخذني هواج
كلبي منذور العشرتج
نحمه طكت من ضواج
ونبعه بيهه الماي انتِ
والهوه البيهه هواج
الهوه البي.... هواج
قيامة ثانية المقدمة كانت القيامة الاولى عام 1991 للشاعر الكبير عريان السيد خلف وذلك بعد فشل الانتفاضة الشعبانية وهذه القيامة الثانية لزمن مابعد التغيير وسقوط الصنم القصيدة صبر أكبور وادموع اليتامه اتطرز الايام والناطور غركان بلذيذ النوم واسلاحه رمح مكسور ذبح ينكل ذبح للجنه عود انروح ودموم الشباب اتكحل الساطور اهنا خوف والم ... واهناك حسره واه دنيه وشاخ بيه البوم وافروخ الدجاج اصكور مسلول الكمر والشمس رمده العين ودخان الجكاير علة المصدور ريه مزكه من الضيم يحضنه جبد منخور حيطان البيوت سيوف تحصد ناس والخطوات تتعثر مشي ناعور همس مخنوك ... طيف يموت دنيا اتدور تبليط الشوارع سجه مسكونه وشبح مذعور وامل مذبوح بينه ايناطر التنور هسه ايفور والطوفان هسه ايثور هسه وأيغسل هموم الناس والايام ترجع عود كمره ونور هسه ويطلع المذخور وايرد ميزان عدل الله ويموت الجور امل والحال ذاك الحال والايام تاكل جور تشرب جور جور ايموت خضر جور اجروح الالم كبرن ..... واشتعل جرح الثار اجو والهور مرك سووه واخواشيك صار الزور وكل ساع وطلع مذخور اهدوم امفصل الدولار وعمامة الخديعة المهم نبني اقصور المهم نلزك صور وانلوث الحيطان والحيطان حيل اتجور موت ابموت ذبح ينكل ذبح للجنه عود انروح يالمذخور شفنه من القيامة اشكال مشينة على الصراط اسنين عمنية وبين المستور والمحظور من باب التقية صار مامحظور يالمذخور شمتاني القيامة اتقوم موهاي القيامة وذاك اسرافيل كل ساع ونفخ بالصور يالمذخور .... يالمذخور ... يالمذخور شك الثام وكتك والحك اسرافيل ساعة ومات من كثر النفخ بالصور 
حسين جهيد الحافظ
<<الصفحة الرئيسية