آيارشمعة عرس              

بوسه اعله وجنة عيد

آلة نسيج ....او عامل وسندان....

    وجاكوج يحضن أيد

بدله ابلون السمه......

.......ومنهه السمه لونه

خيعونه البأسمك كبر.....

.....آيار خيعونه

      ******

2—

آيارشمعة أمل

وجفوف من لون التعب...

....وخيوط دخان المعامل

شالت اهموم السنين...

............ابمتن عامل

دنيه ابتاسع شهر...

.....ابحب الوطن حامل

       ******

3—

آيار شمعة عرس

وي صوت طفلة مهد...

.....تو كامت أتناغي

           حسره

         وطلقه

          ونزيف

هيبه.......

             واجروح.....وصدر عامل

رسم دمنه-ابكورباغي-

صار حبل المشنقه.....

.....من شوكه نور....

...........وظلمه بعيون الطغاة

ما كدر يعبرهه باغي

        ******

4—

آيارشمعة أمل

شفت كل عامل شراره

وكامره اعيونه حديثه

.....حضنت الدنيه فلم

وانكتب دم الشهاده.....

....الدنيه للعمال طابو ...

.......  الدنيه طابو وللعلم

       ******

5—

آيار شمعة عرس

شوك ...ونده عطشان

نجمه وتناغي الكمر

......فرحه وحلم سفان

منذور بيه العمر.....

......اشما يود منذور

روحي العرك كصته

           جفيه

          وماي

         وعطر

هيل .....

..........وضوه

     ...........وابخور

    ******

6—

آيار شمعة أمل

بينه وبينك محنه....

.....صافيه ابلون النهار

عذبه من شوك الفرات

.......الماي دجله

     ............وبعد أحله

شالت الطيبه شعار

والسوالف......

.....بينه هلهولة عرس

امكحله ابلون الشمس

صارت غنه لآ يار

لن تدري هو الأمل..ويبقه الأمل آيار

1 / آيار / 2006       

1-أجمل قصيدة

بينك وبين الناس......

.....سالوفه جبيره

وبالقياس أشكد.......بعيده

لا يضمهه اكتاب...لا صفحة جريده

الناس من تكتب قصيده اعله الورق

وانته......

........انته على أعواد المشانق......

............اكتبت أجمل قصيده

2- طيفك

طيفك ابعيني حديقه

شفت بيهه الدنيه تغريدة بلابل

وأغنية حاصوده ترفه

.........واللحن صوت المناجل

وشفت بيهه بدله زركه

رسمت العشره مشاعل

شالت اهموم السنين

امطرزه اعله امتون عامل

يعزف الجاكوك ....جوبي

.....بايده واتغني  المعامل

3-  عيديه   

هزني آ ذار

حملت الكلب للملكه حنيه

جبته العشرتك قربان......

أذبحه الحبك أضحيه

منذور العمر بينه

الك بالفرحه عيديه

حزمت الفرح باكات.....

........هيل و رازقي  ويسمين

وطشيت العمر شوباش

.....الك     ...للعيد    .....عيد الناس

......العيد الثاني والسبعين.......

..........العيد الثاني والسبعين

                                  16/4/2006

 الأبوذية

ست احروف غير الألف واللام

ابهواهن ما أريد انعذل واللام

  اتطشر عشر نوبات واللام

ابلحد كبري...واصيح الناصريه

وكل حرف منهن حرز يطرد الخوف

   النون نور ايضوي ظلمة كل درب

  والالف آه اشحلاة الملكه بدروب المحب

   والصاد صايدني هواهه من زغر

  والراء راضي والاف فدوه العمر

والياء باهو اليكلي ياهي هيه

  الهاء هاي امي العزيزه  الناصريه

في 31 آذار من كل عام تحل ذكرى عزيزة على قلوب الشرفاء الا وهي ذكرى تأسيس الحزب الشيوعي العراقي

 فاليه اهدي قصيدتي      ---72 زهره

جنت أناغي وجانت أمي من تلولي

 صوتهه ايكطر حنين

عيونه جانت حديقه...اتفوح هيل وياسمين

بيهه شجره..شايل الفرحه ورقهه

او شايله اهموم السنين

كرنفال اغصانهه ودنيه عجيبه

بيهه كل ورقه ابغصن مكتوبه.ذكره

بيهه افراح ..وحزن  بيهه

غنوه بيهه..وبيهه حسره

ازهارهه قوس قزح 72 زهره

6بيضه و6حمره

6 وردي و6زركه و6 خضره

و6 حنطاوي اعله بيجي و6 سمره

و6 يا لون الاوصفه اتحير الرسام بأمره

و6 وي 6 ابرهاوه اتسابكن للموت مهره

و6 شوك اتطشر اعله الناس كمره

و6 ترنو عيون ذيب..ما غفت على الظيم مره

او لا رضت للذل تلين

كالت أمي وصوتهه...ايكطر حنين

هاي شجره الناس كل الناس اهلهه

شوكنه شجرة اهلنه ....شايله اهموم السنين

فتوى  
            الشاعر حسين جهيد الحافظ                    
العراق /الناصرية
 

الوطن ذِمه ابركْبة الزين
اعله غير الزين ما يعتبْ وطننه
ولا يعتمد عالعافوا ابضيج
العاف ابضيج ما هوه من اهلْنه
المايشد احزام النه ابساعة العوز
شلنه ابفزعته ابحلة حزمنه
اليكول آنه ابن الوطن خل يفزع اوياه
ويحط روحه اعله جفه ابغير..منه
مو يكعد يعاين طعنته اشلون......
ويضل بسكوت بجراحه ايتغنه
الوطن آيه ويعثرْ البيه يخونون
وبجفوف اليوده ايصير حنه
شدْ ايدك يخوي ابايدي وكوم....
حرام انشوف يتذبح نخلنه
وحرام أجدام غازي اندوس الاتراب
تره اتراب العراق انعرف جنه
تتباهه الاجدام وبيه تمتاز.....
وتمشي اعليه حنيه ومحنه
يكره كل جدم بيه ينكر الطيب
يطك الطيب وي نكلة جدمنه
العراق ويا وطن ويجادي العراق
موش اتراب وصف اترابه كحله
بيه شجرة نبي وللناس معروف
بيه أول حرف وأول مسله
أبو الشطين هذا وكمرة الناس
يطكن لو زعل شطينه دهله
قاموس الحضاره وقبلة الكون
ما تقبل صلاته.....
الما اتخذ من عنده قبله
اهوْ الكوثرفراته ودجلته زمزم
يهنياله التوضه ابماي دجله
يطب يوم القيامه الجنته ابزود
يطب مغفور ذنبه وذنب أهله
يطب مغفور ذنبه وذنب أهله
____________________________________________________
Noh_alhafz@yahoo.com

وردت اطيور المحبه....الهورهه وغنت سلام

اعيون الأحديثات طرزهه كحلهه.....

            وصارت الحنه وسام

والجوامع كبرن ود ومحبه....

      والكنائس رددن أحله الأنغام

وركصوا اطفال المحله.....شوك أهلهم ....والأيام

طشت الدنيه محنه

وافتره خلك الوطن.....

            وشرع البيبان جنه

وغنت ابفرحه الفخاتي..وشفت أهلنه

املبس وجكليت والحب ازدحام

لا جيش القدس لا جيش شعبي....

      لا مسيرات ورفاق

اصبحن ذني حرام

ولاذ ابو الزيتوني ذله.......لاذ بأكتار المذله

كمره ........وانزاح الظلام

افرح....افرح .......يا وطن

وانكل الخطوات واثق للأمام

ذني وعيونك زوابع ....

      يكضن وترجع تنام

وتحلم انجومك مدينه.......

      بيبانهه ود وئام

 وفرحه..قرحه.......اتشيل فرحه

...............والأوهام

ماتن ابطيحة هبل......والأمل خضر أمل

انهض ...انهض ....يا وطن

(حيي على خير العمل)

صافح اعيون النهار

لوحه حط البندقيه......اتطرز امتون الجدار

واظفر حيوط الشمس...للحب شعار

افرش ارضك مزهريه....وماي نهرانك أغاني

وضحكهبشفاف الزغار

سوي من ثوب العرايس لافتات

اتوضت ابماي الأنهار

نعم للحب.......للتسامح....للحدايق....للأزهار

لا.......كل.....اللا ....لأصوات البنادق

      للتناحر......للتتار